Шагыйрьләр Кунакханә Проект турында
 
Интернетта татар сәнгате
һәм мәдәнияте белән таныштыру
И туган тел, и матур тел, әткәм-әнкәмнең теле!
Дөньяда күп нәрсә белдем син туган тел аркылы.
Иң элек бу тел белән әнкәм бишектә көйләгән,
Аннары төннәр буе әбкәм хикәят сөйләгән.
Г. Тукай
 
 

Зөлфәт

Дуслар белән уртаклашырга

Хаталар төзәтү
Әгәр дә сез орфографик хата тапсагыз, хаталы сүзне тычкан ярдәмендә билгеләгез һәм Ctrl+Enter төймәләренә басыгыз.
Orphus системасы
шигырьләр

Сырынды

Бөтерелә бөдрә сырындылар
Якын килергә дә шомлы ярда -
Гасырларның кара бураннары
Дулый бугай безнең карашларда...

Тәңре үзе җәзалыймы әллә
Сайлап җирнең кайбер кавемнәрен?
Ничә гасыр кайный кара буран! -
Ачыласы юктыр бу көннәрнең...

Ачыласы юктыр язмышларның!
Алгандыр ла тәңре безне сайлап...
Юл катысын эзләп кар астыннан
Изалана һаман күшеккән ат.

Иң гаҗәбе -
без һаман да исән!
Саклап килә безне нинди өмет?
Чынлап та бит - бер ачылыр еллар!
Безнең дә бит кояш чыгар көлеп!
һаман юлдаш булган сырындылар
Эреп юкка чыгар ахыр чиктә.
Гел буранга күнеккән бу җаннар
Түзә алмас сыман ул бәхеткә.

Ә хәзергә... Безгә язган буран
Тынны буып, әйдә, дулап торсын -
Атла, аткай, юл булырга тиеш...
Эзлә генә, эзлә юл катысын!

1992
 
© 2006—2011, Shigriyat.ru
Мәгълүмат www.shigriyat.ru сайтныннан алынган