Шагыйрьләр Кунакханә Проект турында
 
Интернетта татар сәнгате
һәм мәдәнияте белән таныштыру
И туган тел, и матур тел, әткәм-әнкәмнең теле!
Дөньяда күп нәрсә белдем син туган тел аркылы.
Иң элек бу тел белән әнкәм бишектә көйләгән,
Аннары төннәр буе әбкәм хикәят сөйләгән.
Г. Тукай
 
 

Салих Баттал

Дуслар белән уртаклашырга

Хаталар төзәтү
Әгәр дә сез орфографик хата тапсагыз, хаталы сүзне тычкан ярдәмендә билгеләгез һәм Ctrl+Enter төймәләренә басыгыз.
Orphus системасы
шигырьләр биография

Авиа-марш

Әйдә югары,
батыр очучы,
иң биек постта
сакта торучы!
Җитә алмасын
дошман куллары,
әйдә югары,
   югары

Уңышларыңны
бирмә дошманга,
маршалың куша
сиңа очарга
алардан җитез,
алардан ары,
алардан биек —
   югары!

Кара түбәнгә —
илеңә кара,
ничек сыена
канат астыңа
фабрикалары
һәм заводлары...
әйдә югары,
   югары!

Дошманнар һөҗүм
итсәләр бүген,
каплап алырлар
аларның күген
безнең десантның
парашютлары.
Әйдә югары,
   югары!

Ялтырап ага
аста елгалар,
ил тыныч булса,
ялтырар алар.
Болганмасыннар
елга сулары,
әйдә югары,
   югары!

Әйдәгез, кызлар,
сез дә очыгыз;
яныгыздамы
парашютыгыз?
Совет иленең
батыр кызлары,
әйдә югары,
   югары!

Елга, диңгезләр,
кырлар өстеннән
барлык илләргә
Совет иленнән
туры ятсыннар
һава юллары,
әйдә югары,
   югары!

Әйдә югары,
батыр очучы,
иң биек постта
сакта торучы!
Ватанның мәгърур
яшь лачыннары,
әйдә югары,
   югары!
 
© 2006—2011, Shigriyat.ru
Мәгълүмат www.shigriyat.ru сайтныннан алынган