Ренат Харис
Чиксез кодрәт
Караңгыдан котылып була
шырпы сызып;
төнгә кереп котылып була
кояштан;
суга салып сүндереп була
утларны;
кисеп, ватып арынып була
тоташтан;
ярга чыгып котылып була
диңгездән;
туктап торып котылып була
тизлектән;
учак ягып котылып була
суыктан;
дару белән чигереп була
үлемне...
Берсенең дә кодрәте
чиксез түгел.
Чиксез кодрәткә ия тик
бер Куәт —
Вакыт! Бары тик Вакыт!