Мансур Гаяз

Түләтербез

Бер хаксызга күздән төшкән яшьләр,
Бер хаксызга җиргә койган кан —
Булыр иде кораб йөзәр диңгез,
Уйсу җиргә әгәр җыйнасаң.

Азатлыкны горур сөйгән халык
Коллык богауларын кимәскә
Күтәрелде көчле давыл төсле,
Күтәрелде изге көрәшкә!

Фашистларның пычрак явызлыгын
Нәрсәгә дә белмим тиңләргә,
Аны хәтерләү дә — авыр богау
Кидерткәндәй була иңнәргә.

Нинди зур кайгылар китерде ул
Шат тормышлы Совет иленә,
Күтәрә алмый таулар сыгылыр иде
Бу кайгыны алса иңенә.

Җимерелгән сәнгать мәрмәрләрен
Тулы хакы белән түләргә,
Илебезнең изге туфрагыннан
Үз пычрагын ятып үбәргә

Мәҗбүр булыр йөзе кара дошман,
Һәм ул таләп тиздән үтәлер,
Иң хурлыклы җиңелүнең фашист
Бөтен авырлыгын күтәрер!