Шагыйрьләр Кунакханә Проект турында
 
Интернетта татар сәнгате
һәм мәдәнияте белән таныштыру
И туган тел, и матур тел, әткәм-әнкәмнең теле!
Дөньяда күп нәрсә белдем син туган тел аркылы.
Иң элек бу тел белән әнкәм бишектә көйләгән,
Аннары төннәр буе әбкәм хикәят сөйләгән.
Г. Тукай
 
 

Маннур Саттаров

Дуслар белән уртаклашырга

Хаталар төзәтү
Әгәр дә сез орфографик хата тапсагыз, хаталы сүзне тычкан ярдәмендә билгеләгез һәм Ctrl+Enter төймәләренә басыгыз.
Orphus системасы
шигырьләр биография

Бала ашату

Әлли-бәлли иттерергә
Үз әнкәсе бар аның.
Кыстый-кыстый ашатырга
Ун нәнкәсе бар аның.

Калак тоткан әнкәсе
Табак тоткан нәнкәсе,
Алма тоткан апасы,
Кәнфит тоткан әткәсе
- Ашамасаң, мин ашыйм, - дип,
Авызын ачкан әбкәсе.

Тыпыр-тыпыр бииләр,
Бар да көен көйлиләр.
Тамагы туктыр димиләр,
- Ник ашамый бу? - диләр.

Җайлап карый әнкәсе,
Янап карый әткәсе,
Идән буйлап,кашык тотып,
Куып йөри әбкәсе,
Артларыннан табак белән
Ботка сөйри нәнкәсе.

Песи баскан каршына,
Маэмай качкан артына,
"Мин ашыйм" да "мин ашыйм" дип,
Килеп җиткән барсы да.

"Мияу-мияу!" - апасы,
"Кыйгак-кыйгак" - атасы,
"Бак-бак-бак-бак!" - әбкәсе,
"Кыт-кыт-кыт-кыт!" - нәнкәсе.
- Китегез сез, үзе ашый! - дип,
Куып тора әнкәсе.

Әбкәсенә ач кебек,
Нәнкәсенә тук кебек.
Әнкәсенә атна буе
Капканы да юк кебек.

Чәбәк-чәбәк әнкәсе,
Чыбык эзли әткәсе,
Борып-борып чеметергә
Җаен көтә нәнкәсе.
- Кыйнамагыз, ашый ул, - дип,
Аерып ала әбкәсе.

Җиде төрле аш кына,
- Аша, балам, - чак кына!
Бала, мескен, кашык күрсә,
Кача өстәл астына.

- Аурыйдыр, - ди әнкәсе,
- Врач дәш! - ди әткәсе.
- Врач нәстә белә соң ул,
Өшкертик! - ди әбкәсе.
Барысын тотып өшкерергә
Кызыгып тора нәнкәсе.
 
© 2006—2011, Shigriyat.ru
Мәгълүмат www.shigriyat.ru сайтныннан алынган